最近因特首為施政報告諮詢，兼財爺三招十四式「疑似無效」而再次激起政客群起索其政治油水，大放復辟居屋言論。由傳媒報導可見，反對居屋嘅主力仍是學者、分析界、傳媒社評【註】、當然還有地產業界，而且每每舉出經濟政治理論及實質數據證明居屋害多與利。
反過來過去兩星期力推居屋（甚至資助置業）嘅各路人馬，幾乎清一色係需要攞選票、增政治資本嘅人士，如梁振英、陳永棋、譚耀宗、王國興、李永達等等，而呢一派嘅理由除咗「樓價高致民怨大」，「大學畢業生買唔到樓」等似是而非嘅邏輯之外，似乎冇乜理論根據（民怨根源係管治而非樓價，大學畢業生唔應該買一手豪宅或二手龍頭屋苑而揀單棟舊樓，政府更唔應該資助佢），甚至有人用七月時三萬九千個申請超額十一倍嚟以數字證明「居屋需求龐大」。可惜呢個咁嘅需求係行政行為堆砌出嚟嘅（詳見筆者六月一日以《入息限額證公營房屋「隊冧」私樓》為題之另文），兼且係一個超級大滯後嘅指標！點解？
以圖示理，更勝雄辯
圖：政客到底係為你好定無意中推你入火坑？
如上圖所示，喺2001-02年樓市低殘時，亦正是本港過去二十年間最佳嘅買樓時機，但係同時推售嘅24期A居屋認購超額倍數卻達歷史新低嘅1.1倍，依家啲大叫買唔起樓嘅人嗰陣去晒邊？啲鼓吹復建居屋嘅政客又鼠咗去邊？
然而當今日2010年樓市開始有過高跡象時，呢班居屋政客竟然「忽然正義」，群起要為民請命，幫人買樓……講得好聽，呢啲就叫做後知後覺或思維混亂，隨時良好意願變咗害人不淺；講得唔好聽，咁樣嘅置業資助計劃，等同濫用公帑去引誘啲冇經驗或貪納稅人著數嘅市民喺市頂接火棒，重複97年嘅悲劇。
上圖亦徹底推翻一個撐居屋陣營最核心嘅論調，就係中下階層買樓係攞嚟住而唔係投資嘅，如果係咁嘅話，點解01-02年市底「性價比」最高時冇人買居屋（得一點一倍超額認購）？點解依家樓價飛升時呢啲所謂用家就全部伸手向政府攞便宜，造就七月認購超額十一倍呢個爭崩頭現象？此乃市民買屋係以投資為主，自住為次嘅力證！
戒癮將大功告成，行岔可走火入魔
喺接近市頂同市底時都係政府「做大事」嘅引誘最大之時，但亦係施政者最需要定力同原則嘅關頭。我哋房屋市場經過咗咁多回經濟盛衰週期，今趟係第一次有機會俾政府忍手旁觀，讓樓市自己調節，切勿喺呢個緊要關頭前功盡廢！筆者所指即係由得樓價升過籠再跌番落嚟，而唔係喺政治壓力下亂晒陣腳，藥石亂投，反而倒行逆施，擴大波幅，拖長調整期（格林斯潘嘅所謂永遠增長、無周期嘅經濟管理哲學結果導致美國史上最大嘅資產泡沬……可見政府自以為能駕馭資產價格水平呢個諗法係極幼稚嘅！）。復建居屋或資助置業就係咁樣一個看似可神功早成嘅捷徑，但卻係令執政者陶醉於自己無限擴大嘅權力中，走火入魔。切戒，切戒。
【註】包括今期《壹週刊》內嘅《壹觀點》同《另壹角度》兩篇文章，值得壹讀！
English 
Chinese