Hong Kong

香江使用八達通有進步空間

本欄講過同規劃/城際競爭有關嘅話題都會議論一番,今期就偏離一下純粹地產,講一講交通同效率!月頭嗰陣粵港簽訂合作框架協議後,筆者見其中一項大大利民嘅目標,係推進香港「八達通」與廣東「公交一卡通」的互認互通,最遲到二零一四年可以二地居民喺粵港二地「一卡通」乘車及購物咁話。 八達通呢個咁絕妙嘅便民概念其實喺香港呢個發源地都仲有空間發揚光大,只係可能需要政府加多把勁拉佢一把,鄙人相信反對嘅聲音一定被支持嘅歡呼聲蓋過!以下略舉兩個例子。 一、的士都應該嘟卡 的士應畀乘客選擇「嘟」卡,雖然依家的士喺交通量嘅市佔率得百分之八點四左右,但每天都仲有近一百萬宗交易,認真唔係嘢少!如果每位乘車嘅市民每次俾錢時慳番十秒鐘,咁每天就為全港市民慳番二千萬秒時間(一千萬歸乘客,另一半係俾司機大佬嘅);除番出嚟即係每天每一方慳成二千七百個鐘,再攤分與全港一萬八千位司機,咁每位司機大佬無端端多出十五分鐘空閒時間嚟,做乜都得啦!如果以年嚟計,就每位司機大佬一年慳番成二日幾,認真係少數怕長計! 另一費時嘅舉動就係打印收條時個印字機聲大夾慢,害唔少乘客喺落車前乾等;點解的士行業唔逐步將呢啲陳年嘅產品「升呢」啫? 二、為環保,隧道/收費路段更應嘟卡! 除的士應安裝八達通之外,另一百利而無一害嘅基建就係將全港所有嘅收費隧道裝埋八達通!如此有三大好處: ①慳時間:政府數字顯示,每天快易通嘅交通量為三十四萬架次,但只係總流量六十九萬五千架次嘅一半唔到;可見每天有三十五萬位司機要停車俾錢,就算隧道收費劃一,動作簡單,所多花嘅時間可能只得五秒,但用番少數長計嘅原則,可推算到每天全港可省回四百八十六小時嘅司機時間; ②時間事小,環保事大:有統計指出,喺大約時速五十至六十英哩時汽車,用油量大約係每加侖行三十英哩,但係喺加速至呢個速度之前,用油效能可低至每加侖只有十英哩(當佢平均喺每加侖十五英哩先)。假設每輛車都喺畀完隧道費之後用十五秒時間加速至五十英里速度,咁每天全港嗰三十五萬輛用現金俾錢嘅車就等於用一千四百六十小時喺度無謂減速加速;換句話說,即係有三萬六千五百英哩嘅行程係喺雙倍耗油狀態下行駛,亦即係每天因為要停車俾隧道費,香港都用多咗一千二百一十七加侖(四千 六百公升)電油,或以現價嚟計係七萬餘元,一年落嚟,就浪費成二千五百萬元! ③免誤人青春:如用八達通,咁全港每天可減少僱用過百位收銀員,佢哋唔單只工作枯燥無味,更長吸廢氣,兼係手臂機械動作下隨時勞肌損傷。 裝上八達通閱讀機(最好係可以喺高速下嘟卡嘅)後,唔單只以上 三項弊端得以避免,更可能因隧道交通暢通咗,令全港塞車情況都改善埋,特別係繁忙時段喺隧道入口外嘅嘅長龍,則慳得更多,造福市民更甚矣!

西九文化區—多元有機更勝形象工程

大概兩三個禮拜前西九文化區管理局委任了Graham Sheffield(謝卓飛)為行政總裁,為呢個十大基建之一嘅項目再向前踏出一龜步。筆者在此探討幾個西九規畫上好容易被忽視嘅方向同原則: 小巧玲瓏勝過大而無當 最令人擔心嘅仍然喺呢個行政主導嘅項目好有機會又係形象工程一個!點解?如果冇震懾天際,譁眾奪目嘅建築物,咁政府各大官又邊有萬世流芳嘅功績?咁管理局內眾「專家」又何來實貨交功課? 其實要文化璀璨多彩,係完全唔需要好似「鳥巢」或「水立方」呢啲講得唔好聽係中看不中用嘅地標。以前者為例,嗰七萬噸鋼材所堆砌出嚟嘅榮耀,而家據報做過一次貴族小學嘅運動會會場之後,其他時候都係擺喺度發霉生鏽;因為淨係租金同保安,每開一場「盛事」隨時成本過千萬,除咗米高積信呢種地位嘅天王巨星之外,都怕冇人有咁大嘅叫座能力嚟回本矣!由此可見,香港要從呢度吸取教訓:想建築吸引切記引適可而止,總之起出嚟嘅產物小巧玲瓏勝過大而無當。 各位唔見大會堂可座一千四(常滿),文化中心可座兩千(常滿),伊館可座三千五(小滿),紅館可座一萬二千五(唔多滿)……? 百花齊放乃致勝之道 如果問各位讀者喺英國最印象深刻嘅文化經歷喺乜,除咗大英博物館外(呢個喺靠內容取勝,並非地點或建築!),可能唔少人會話倫敦西區(West End)嘅音樂劇同話劇表演,點解?因為有得揀吖嗎!維基百科話西區內有四十間劇院之多,同時上演數以十計嘅各式劇目,令人目不暇給,眼花撩亂!而呢個就係香港所需要達到嘅「臨界質量」。 換個角度嚟睇,紐約最令人神往嘅文化活動,除咗大都會藝術博物館(Metropolitan Museum of Art,呢度亦都喺以質取勝!)外,都怕喺百老匯嘅各式劇院啦掛!維基百科有咁啱得咁橋,又列出四十間百老匯劇院出嚟※;大家想像下呢啲劇院支持到幾多創意人材,帶嚟幾多遊客,製造幾多就業機會(仲係六大產業之一添)? 所以西九應該部署嘅唔喺多啲乾淨整齊嘅商場式大建築,而係三十至五十個容量喺三百至千五座位嘅演藝場地,加插喺餵飼咁多睇戲人流同工作人口嘅飲食場所之間。此外,喺未來嘅高鐵總站上蓋設立其他藝術文化空間,俾相關行業發酵光大,甚至擴張規模。 每所劇院長線要自負盈虧,但係初期可能先免租五年,以俾整個文化區自尋生路,有機(而唔喺行政主導下)發展—咁樣喺市場嘅力量下,好快就睇到香港/中國/亞洲娛樂口味會係乜嘢比例下喺呢個大溫床上生根結果(可能有唔少棟篤笑節目,又或喺英語音樂劇,但係市場有需求嘅話又點解唔俾佢存在呢?);好過政府為分配利益左右為難,顧此失彼,將場地派俾市場唔需要嘅藝術形式,最終全民受害。

財政預算切勿向理性同原則操刀

財爺曾俊華將於下個禮拜三發表一○至一一年度財政預算。各方利益團體一早已百花爭鳴,喺地產領域最熱門議題莫過於提高豪宅印花稅(有話二千萬元以上樓價住宅由3.75%加至4.5%)。 事實一:香港經濟正強勁復甦(2010年GDP預測:港大:4-5%;恆生更樂觀:8.6%),毫無派糖需要,否則盞惡化下半年嘅通脹壓力; 事實二:有好多結構上問題須要解決,將錢用喺呢啲長遠大事上比施小恩小惠更重要,因民意好飄忽,今星期攞咗零用錢,下個禮拜唔畀重嘈得犀利。其中一個樓市結構調整重點就係活化二手居屋(見下文); 事實三:任何打壓豪宅嘅措施皆對整體樓價上升杯水車薪,因為樓價急升係政府超低私樓(請留意:唔係公屋或居屋)土地供應所一手造成嘅,喺美國狂印銀紙下更推波助瀾。唯一解決方法係倣效大禹治水——用疏浚而非圍堵(詳見下文),唔係嘅話實將香港辛苦經營嘅投資天堂同自由市場呢啲「薄幸名」雙手奉畀星加坡! 禹用啱方法,連舜都要禪讓帝位 筆者喺舊年11月24日「活化二手居屋市場何難之有?」已詳述呢個能夠一石二鳥嘅天下第一妙計:如果居屋呢個龐大市場(佔私樓34%存量!)能夠解封,唔單止可以大大減慢樓價上升動量(因為私樓市場轉眼間擴大咗三分一,兼且多咗好多低價單位!),更能將呢個沉睡嘅巨大經濟潛力同時發揮——因為二手居屋2008年成交佔存量不足0.7%,一旦解放,成交量上升至二手私人市場之9.7%水平,隨時庫房嘅印花稅收入同時狂漲三分之一(好年頭如07/08印花稅曾達五百廿億之巨,係整體庫房收益嘅五分之一,可見呢項房屋市場改革對擴闊政府稅收嘅重大影響)!此外,因為多咗居屋流通,其他經濟環節如地產經紀、銀行借貸、裝修、傢俬家電零售等等亦跟住旺埋,咁庫房喺利得稅同薪俸稅再收多筆,認真和味……此正是綱舉目張,四兩撥千斤也!財爺能與呢件改革拉上關係,隨時連競選下屆特首嘅政治資本都自動提升,不費吹灰之力而營造青出於藍嘅政績。 香港前途在於引入富人,唔喺貧富均等 當全中國所有城市都喺度你追我趕引資升咧之際,如果香港反其道而行推行如英美之趕富仇富民粹政策(即係無理濫加高收入階級嘅稅費)最終只會喺呢個人流資金流都極易挪移嘅時代驅趕財神,自斷米路,平白又益咗區內其他對手。 唔單止如此,港府嘅小政府大市場形象亦可能再度受挫,圖增高收入人才來港搵食嘅成本及精神阻力,以及打擊中產階級換樓改善居住環境嘅能力。成本利益相較下,加印花亦認真唔值得:09年二千萬元以上豪宅成交只佔整體二手樓市嘅1.2%,呢著只會逼投機炒賣向低價樓埋手,反而引來更多政治壓力令政府做更多扭曲市場嘅行政措施(而唔係向供應短缺呢個根本原因著手)為未來改革安插路障。 記住:禹因疏導而得天下,鯀因圍堵而失頭顱。

人口總量與城市影響力—香港要大開中門!

香港一向自以爲傲嘅一項優勢—即係自由流通、充滿活力、中西交匯嘅人口—好似越嚟越有畀區内各大對手遠遠拋離嘅跡象!令人擔心港府過去幾年喺區域競爭策略上再次後知後覺,缺乏長綫思維。 何以見得呢?唔單止香港已經將航運量呢個寶座拱手讓俾星加坡/深圳/上海之流(呢樣嘢尚算唔太重要,當今先進嘅世界級城市已經唔係靠貨櫃吞吐量嚟比試強弱),仲喺過去兩年連股市市值/成交量都俾上海爬埋頭(呢鑊就好大件事啦,所以幾大都要喺債券市場同外匯市場贏返嚟—前者靠爭取中國容許國企民企喺香港發債,後者亦睇怕要靠祖國先可以同新加坡一爭長短)!總之再唔快快變通求存,喺未來可能出現嘅高增值領域上寸土必爭,同時加大自己嘅本土經濟動力,就認真冇眼睇矣! 表:京滬星人口增長大幅拋離香港 其中一個現代都市加強自己實力所必爭之地,就係人口嘅數量同質量。係呢方面香港一直冇好似内地成市咁「攻城掠地」,由行政上吞併鄰近縣市嚟壯大自己,更冇好似星加坡咁高瞻遠矚,規劃將人口由零九年嘅五百萬大幅提升至六百五十萬。即管星加坡政府冇正式指出達標時限,但由過去幾年嘅年人口增長率嚟睇(見上表),大概十一年內就可功德圓滿,再喺另一領域縮窄與香港嘅距離! 香港喺同小弟弟比都已經有壓力,咁同更高大威猛嘅對手就更冇得揮—上表好清楚嘅一個趨勢就係,即管北京同上海呢啲超級大阜都對自己千七萬、千九萬之數嘅人口好唔滿意,喺01-08年間以3.0%及2.3%嘅超高複式增長率嚟壯大各自影響力同經濟增長動量(連星加坡喺同期都有2.3%嘅增長率)。香港喺01-08只享有區區0.5%嘅年人口增長率,咁落去唔單止會被京滬越拋越遠,更喺廿年後俾新加坡迎頭趕上! 香港不能夠坐視自己一個又一個優勢被人臨摹超越,好應該:1)學新加坡一樣,制定人口增長目標(唔係數量,而係總增值—如以四大經濟支柱企業之總部,六大產業機構落戶後所製造之經濟效益—嚟衡量);2)爲高增值產業大開方便之門,提供物以類聚,成行成市嘅條件—如醫院城,新金融區(見一月十九日愚作擴大CBD供應 救救香港區域地位),影城,國際寄宿學校群,等等。喺多吸人才嘅大前提下盡快提升本地嘅經濟總量,務求喺未來十至二十年內起碼達到超京趕滬嘅人口增長率目標(一年2.3-3%;能達到港深同城化都算數!),咁重拾亞洲龍頭地位就唔再係越嚟越遙遠嘅夢想矣。

環保交通 單車爲首

除咗上期講到香港海旁綠化及行人化嘅重要性之外,另一未來會越來越重要嘅城市規劃趨勢將會係交通呢項活動嘅環保化及健身化—即係隨着文化高度發展,市民對健康嘅要求提升,會有越嚟越多嘅市内交通由雙腳(行又得,跑又得),人力驅動工具(滾軸溜冰鞋其一,單車其二),甚至人力車來提供。 喺今日嘅香港呢個概念可能係有啲天方夜譚嘅味道,但係四五年前佢已經喺紐約同倫敦開始風行,至今唔單止歷久不衰,直情係更加發揚光大;唔信各位睇睇以下倫敦City金融區内所拍相片爲證,爲筆者09年下旬實地攝得。至於紐約就更巴閉!而家唔單只單車送文件嘅後生通街都係,連人力三輪車都越嚟越普遍,佢哋唔單只平過的士,仲唔受塞車影響,好易就去到目的地;當然喺紐約仲有一個港英都冇嘅公共交通工具,就係中央公園附近嘅馬車啦(見附圖)!咁點解人哋呢啲世界一流城市能夠成功推廣普及咁健康咁環保嘅交通模式,而香港就無汽車而不歡呢? 原因有叁:一)香港地小山斜,人多車逼,不適宜有轆嘅人力交通工具;二)香港天氣酷熱潮濕,無理由到咗目的地臭汗淋漓之下去番工,更遑論拍拖也!三)其實最主要原因就係冇政府政策上嘅鼓勵同配合—由下面嘅相可見,倫敦呢個路彎巷窄嘅老城市都有器度同信心去推動單車作爲一種交通工具,並喺最繁忙嘅要道上畫出單車專線,咁點解香港就除咗沙田大埔有啲消閒單車路外,呢個咁優質嘅交通模式係市區卻幾近絕跡呢?點解唔闢多啲冇咁斜嘅山路?又點解唔起多啲公共淋浴及泊單車場? 唔通係政府怕出交通事故(唔少本港嘅山路又的確係好驚險)?但係成個柴灣至貝沙灣,由九龍灣至荃灣到都可以喺海旁平地平穩飛馳噃!定係官員更怕自己揸車嗰陣俾單車喺前面拖慢行程?唔似啫。咁剩低就只有一個可能原因,就係政府部門間壁壘分明,互不相通呢個死結;加上少做少錯心理,仲有邊個伸個頭出嚟做大事? 香港實在係時候重新檢討下交通策略同未來社會嘅可持續性。鄭局長,點睇呀?

上海河濱超前,香港海旁失色

上個禮拜上海世博百天倒數開始,代表呢個動力城市又將踏上另一台階,於四月開幕時以更新面貌示人!除咗世博會場及市内無數嘅工程會喺四月全部完工(或停工),另一個惹人注目嘅基建項目就係外灘嘅「濱水區改造」工程啦。 呢個項目就認真巴閉囉—市政府嘅目標係將外灘升級至與「香榭麗舍相媲美的高品質街區」(注意:而唔係維港!)。如果目標達到嘅話,随時拋開香港嘅中環灣仔繞道海濱(連名都蹺口過人,你話遊客喺問“where is the bund”容易定係“where is the bypass”更印象深刻?)九條街;何解?人哋設計要求已經贏咗:1)最大限度地釋放公共活動空間...創造充裕流暢的濱水休閒空間;2)展示歷史文化風貌特色...打造上海最經典的濱水城市景觀;3)優化、整合公共服務,提升外灘區的品質。相比之下,中環未來海濱係起高速公路嘅副產品,人文、休閒、地標、景觀等更重要嘅因素通通要靠邊站。加上人哋河濱設計係由國際眾多團隊嘅方案中挑出上上之選,而我哋海旁藍圖則是政府閉門造車而成,喺集思廣益呢方面再蝕多一瓣。 此外,喺好多理念上滬港嘅出發點已經係背道而馳: 1) 車係配角—外灘工程完成後,公眾活動空間比原先增加至少四成,地面車道由十條減至四條,將繁忙嘅交通移至地下。而香港連有填海之便都唔乘機將道路藏喺地底,反而把最嘈,最污染,最醜陋嘅汽車擺晒上地面,連電車咁環保休閒嘅交通都摒諸門外,真係唔知政府點唸嘅。 2)以人爲本—連接外灘會係一係列嘅步行天橋,就算未行到江邊,行人已可觀賞對岸浦東地平綫以上嘅景色;而且由外灘建築物外無須上天橋,直過馬路也可達河畔,充分顯示人車嘅主次之分;此外,步行至江邊會有一系列草坡供市民坐地觀景。喺十六鋪碼頭更有設施供人進行健身、滾軸溜冰、滑板、甚至攀岩等運動。外灘1.8公里河邊竟有四個廣場可供「小型慶典、觀賞表演」等創意性、非發牌管死嘅活動。可以想像,香港版本會冇行人過路燈之方便,冇草地之養眼,冇向海下斜之地形,但就布滿數以十計嘅各種「不准」標誌! 3) 高度綠化—上海計劃將綠地由黃浦公園延伸至道路中間,由此自然地創造出一片下沉式公園。香港實在應該唔將一塊大有前途嘅海濱綠色休憩地變成另一個維園(即係爲方便而將一個市肺變成石屎硬地!) 4) 製造地標—喺外灘南端,會有一五十米高嘅觀景塔俯覽兩岸風光。反觀未來中環海濱,則地標欠奉,實在令人失望! 喺中環灣仔繞道尚未米已成飯之前,好多設計上嘅改善都仲未太遲,曾特首或林局長,請發揮你哋嘅行政主導權,免維港呢件舉世絕頂嘅天然資源因人爲因素搞到大海輸畀小河,則功德無量矣!

再論香港人口密度

上文筆者鼓吹香港應繼續實施高密度發展模式,以便保存所謂「臨界量」之各種土地用途,喺本港有限嘅土地面積中製造進行最多唔功能及活動嘅空間。有人問,咁到底香港又點咁逼法呢?呢個係一個話難唔難,話易唔易嘅問題,因爲喺密度上嚟講,有好多種唔同嘅定義,單單喺城市人口密度上都有好幾個唔同嘅層次嚟排名,喺度不如與各位分析一下: 表:市區/城市/都會群/行政區域層面嘅人口密度排名 1)城市小區嘅密度—由上表嘅第一列可見,香港嘅人口密度根本就唔入流!頭三名畀印度城市攞晒,不過澳門卻意外地入咗第五位!跟住除咗馬尼拉打入第八之外,幾乎畀印度同孟加拉城市包辦;而且喺頭位嗰幾個區份嘅人口密度比排名25嘅香港觀塘(每平方公里五萬一人)多成倍有凸。至於中國大陸,則有上海黃浦喺第35位入圍。呢個排名顯示喺市區内嘅密度越高通常代表生活環境越壞;香港觀塘之所以入圍,當然絕非佢係咩嘢「傳統豪宅」地段,而係市建局要大都闊斧重建之舊區。 2)城市嘅密度—呢個係最通用嘅人口密度單位,理論上更能反映一個城市嘅整體經濟能力同資源分配(包括人力資源)。喺呢度香港其實一啲都唔人煙稠密,因爲我哋連五十大都唔入,印度、孟加拉、同菲律賓再度稱霸,頭20名占去16位之多。最大嘅驚奇可能喺巴黎,竟然進入31名之前茅。澳門則屈居40位。人口稠密嘅中國亦無一城市上榜。睇嚟我哋要將個網放得再大啲先可以。 3)都會群嘅密度—都會群嘅概念係一個核心都市以及佢嘅「影響範圍」内之其他城市所組成嘅經濟體系。我哋仍然用返維基百科上之排名榜,今次香港-深圳被組成一體並排名第7,亦係較發達都會群中最人口稠密嘅一個,高於東京(第8位),上海(11位),及倫敦(18位)紐約(19位)等大金融中心。由呢處可以睇到,香港要喺世界舞台上佔一角色,實在須要加大自己嘅腹地,因爲空間越大,所容納嘅經濟活動就越多,亦同時更能減低營商嘅土地成本。 即係話,除非香港減少本土人口(不智也!),要向其他國際都會嘅人口密度看齊嘅話特區政府唔單止要填多啲海(譬如喺新界西接近深圳嘅後海,既較低生態價值,又接近自己天然嘅衛星城市),仲應該盡快鼓勵深圳加入好多其它中國城市正爭個不亦樂乎嘅擴市遊戲(如廣州吞食佛山、白雲、增城等小城及縣市以壯大自己嘅實力一樣),噉樣將來港深融合之時度仲有更大嘅備用空間可用。 4)行政區域嘅密度—呢個關乎主權或獨立行政個體嘅人口密度,被各前殖民地佔去頭20名。香港作爲一個特區,名次再度升呢去到第4位。相對下,人多大國如印度同中國反而跌到32名和78名之遙。既然香港已非一個獨立經濟體系,而越嚟越同中國融爲一體,所以呢個排名反而唔太重要。 以上數據應該幫大家更清晰認識到我哋經濟模式及未來發展嘅方向。可以話,高密度並非高收入同高効率嘅原因,但係喺香港呢個制度下,我哋嘅高密度模式卻發揮咗驚人嘅經濟威力。呢個互補優勢實在有需要繼續發揚光大。

香港應否繼續行高密度發展模式?

近日發展局及城規會不斷將市區嘅發展密度降低,其出發點當然係良好嘅,如保護山脊綫,避免屏風效應(特別係海邊樓宇高於內陸呢個現象),減少路面擠塞等等;其他嘅原因可能包括香港現在急劇放慢嘅人口增長率,甚至同建設「優質生活環境」及與日俱增嘅環保意識都有關係(注一)。 但係掉轉過嚟講,香港到今日爲止所奉行嘅高密度發展模式其實大有佢嘅好處: 第一,佢直接增加市區嘅人口同商業密度,令香港所有活動之効率都係世界領先,無形中減低所有交易嘅成本,增加本地產品同服務嘅競爭力—呢個其實係香港經濟高効率嘅一個秘密武器,係大部份其它城市難以複製嘅優勢;另外,人嘅高度集中亦使到思想交流,知識分享,服務競爭,等高層次高增值嘅價值更快更有效咁顯現發揮! 第二,即管喺市區樓宇密度高,但係香港嘅綠化面積仍然係總陸地面積嘅七成有多,證明香港嘅綠化緩衝帶非常涇渭分明,郊野公園仍然受到良好嘅保護,爲市民提供世界級嘅山水田園風光;呢個係一個更精細嘅土地應用分工,唔似好多其它大城市咁,各種低密度建築物係無邊無際咁向外伸延,將大面積嘅公眾休閒空間嚴重私有化及支離破碎化,就算想去郊野輕鬆一下都要揸車一大段時間,點似香港咁,幾乎由任何屋苑向任何方向走唔使十五分鐘就可以離開繁囂,進入大自然! 優化居住環境可向高度埋手 如果有咁多好處,咁點解政府又開始背棄呢個行之有效嘅發展模式呢?其中一個原因係市民嘅要求隨着生活水平提升而越嚟越高—又要有高樓底,又要大單位,又要會所豪,又要門口綠化...其實政府嘅最好應對方法就係將呢啲要求全部向高空發展,即管係土地有限嘅情況下,香港仲有無限嘅高度空間何以利用—道理好比集成電路板咁,係同一面積嘅板上印上多層電路以增加効率,喺地產上呢啲就叫做空中花園,環保露台也!至於熱島效應,都可以由高度方面埋手—越高嘅大廈,其實可以裝越高嘅中央冷氣,應該更容易散熱,甚至可以利用香港獨一無二又無處不在嘅製冷劑—海水嚟增加空調能源效益。此外,高度嘅反面就係深度,呢個其實係日本已經行之多年,不過喺香港仍然未普遍也(多數係同政府嘅地契條款有關,呢個題目另文再探討)。 筆者嘅立場到此可能已經昭然若揭,篇幅有限,下期再討論發展密度同佈局與城際競爭力嘅關係。 注一:發展局局長林鄭月娥在立法會會議上,就「重新審視九龍臨近海濱土地用途」動議議案的開場發言:http://www.info.gov.hk/gia/general/200912/09/P200912090320.htm

羞家到貼地嘅旅遊景點

香港一向以令人驚嘆嘅都市風情同冠絕天下嘅維港夜色,吸引無數遊客來此觀賞消閒。其中一個無數訪客必到景點,非中環至半山自動扶手電梯(下稱扶梯)莫屬。究竟乜嘢原因吸引到多至百分之八嘅訪客(旅發局數字,即係一年成二百四十萬人又或係每天七千人;相當於總人流約八萬人次嘅一成)嚟睇一個我哋眼中平平無奇嘅 日常生活工具呢? 所託非人 無它,因為扶梯上咗健力士世界紀錄,係全球最長嘅室外扶手電梯系統(全長八百米,上下落差有成二百米,由二十十多組梯道合成,由一面去到另一面只需二十至二十五分鐘),所以有號召力。加上直達SOHO心臟地帶,有蒲有食,兼且順手睇埋本地人嘅生態同一嘆香港嘅高密度建築現象,實一行數得也! 既然咁好,又何出羞家之言?一言蔽之:呢個應該充滿美感,畀行人方便、睇起嚟感覺舒服嘅生物、朋友,被徹底功能化矣,儘管為維修清潔方便,但睇起嚟感覺如進入塑膠金屬廠,裝飾唔單只褪色兼殘舊,品味上亦低俗加幼稚。總之有驅人快步檻過,目不斜視嘅功效。唔信你自己去問吓人,十個入面有幾多個話扶 梯係視覺上吸引,有幾多個會自豪咁推薦俾遊客? 咁係唔係香港冇咗有設計頭腦、又識得將公眾場所裝飾得美輪美奐嘅人才呢?當然唔係!其實同好多香江怪現象一樣,半山扶梯問題嘅癥結就係所託非人。上網一查,原來呢個咁地區性嘅本土文物似乎墮入一個三不管地帶,尤其係設計同美感方面,喺運輸署網站好唔容易先發現原來扶梯係機電工程署管理,但同時又喺網站另一部 分話扶梯嘅營辦商係一間私人公司(富城物業管理);講得唔好聽就係判上判,反而最與之息息相關,最有興趣將扶梯做到有口皆碑嘅,亦最應該有全權管理佢嘅半 山市民同商戶(或代表佢哋嘅中西區區議會)、旅發局,甚至係文物保育專員辦事處睇嚟都完全冇權插手。 其實解決呢個問題應該唔難,橫掂都係判咗出去,運輸署點解唔直接同中西區區議會及旅遊餐飲業約定一個靈活(即係地區民眾商戶會覺得可接受,但又可隨口味同風俗而改變)兼易監察嘅約章;咁樣既能增加地區既積極性同參與度,更活化美化兼責任化地管理類似呢啲旅遊消費公眾資源,況且政府亦可以達致放權於民,真正實行小政府、大市場原則。唔單止優化社區環境,連政客要鬧政府都少咗理由,何樂而不為呢? 免費推廣 此新運作模式,可在將落成的正街扶梯系統試行,畀佢由建築設計至裝潢用料都加入地區參與及商界意見(佢哋要係度長期用,所以一定更全情投入),可以預見,西營盤未來嘅扶梯會比中環嗰個更吸引人,到時再多啲荷李活大片嚟香港取景(《蝙蝠俠》係對上一齣係半山扶梯拍嘅片),免費做推廣,豈不妙哉! 旅遊、市容同地產息息相關,遊人多到之處,樓價也會因之得益,半山區的業主他日想必歡迎呢種運作模式。鄭局長你話呢?

en_GBEnglish
Scroll to Top